Кремљ: На Русија ѝ е потребен траен мир со Украина, а не привремено примирје

Русија останува на ставот дека на Украина ѝ е потребен траен мир, а не привремено примирје, изјави портпаролот на Кремљ, Дмитриј Песков, коментирајќи ја можноста за договор за прекин на нападите врз енергетската инфраструктура.

„Ништо не е променето. Потребен ни е мир, а не примирје“, рече Песков на прес-конференција во Санкт Петербург, додавајќи дека конечен договор за завршување на војната не е можен без учество на украински претставници.

— реклама —

Според него, некој во Киев мора да донесе одговорна одлука. Песков, сепак, не откри под кои услови Москва би прифатила договор за запирање на нападите врз енергетските објекти.

— реклама —

Прашањето за ограничување на нападите се разгледува во период кога последиците од војната претставуваат особено сериозен проблем за цивилното население пред почетокот на зимските месеци. Русија продолжува да ја напаѓа украинската енергетска инфраструктура.

Песков се осврна и на изјавите на финскиот претседател Александер Стуб, кој повторно го изнел заедничкиот европски став за војната во Украина. Портпаролот на Кремљ оцени дека придонесот на Стуб во мировните преговори би бил позитивен доколку понуди конструктивни предлози, но не и ако само ги повторува ставовите на Европа.

— реклама —

„Ќе видиме колку конструктивно господин Стуб може да придонесе“, изјави Песков.

Тој коментираше и извештај за можните економски последици од суспендирањето на членството на Ерменија во Евроазиската економска унија, предводена од Русија. Песков рече дека Кремљ сè уште не го разгледал документот.

Претходно, руската влада објави заеднички извештај со владите на Белорусија, Казахстан и Киргистан, во кој се анализираат можните последици од суспендирањето на примената на договорот за унијата во однос на Ерменија. Документот се однесува на потенцијалните влијанија врз ерменската економија, но Песков не најави никаква одлука за статусот на земјата во сојузот.