Руското Министерство за дигитален развој, комуникации и масовни медиуми соопшти дека нема планови за воведување ограничувања за пристапот на децата до социјалните мрежи.
Реакцијата на Министерството следи по медиумските наводи дека на малолетниците во Русија би можело да им биде забрането користењето апликации за размена на пораки и социјални мрежи, пренесува ТАСС.
Причина за шпекулациите била новата верзија на Правилата за обезбедување телефонски услуги, според која на детските СИМ-картички нема да се испраќаат СМС-пораки, освен оние што доаѓаат од државните информатички системи.
Од надлежното Министерство објасниле дека дополнителните безбедносни опции за детските СИМ-картички може да се активираат исклучиво на барање на родителите.
„Министерството за дигитален развој не планира да воведува ограничувања за пристапот на децата до социјалните мрежи“, се наведува во соопштението.
Се додава дека сите мерки што се однесуваат на детските СИМ-картички се применуваат исклучиво по одлука на родителите и имаат цел дополнително да ги заштитат малолетниците на интернет.
