Русија и Србија имаат партнерски односи кои им овозможуваат на Москва и Белград да разговараат и за најчувствителните прашања, изјави портпаролот на Кремљ, Дмитриј Песков, на маргините на Меѓународниот економски форум во Санкт Петербург.
Песков истакна дека Русите и Србите ги поврзуваат посебни историски и верски врски, но нагласи дека Србија е независна и суверена држава која самостојно го избира својот развоен пат и сама се справува со предизвиците со кои се соочува.
„Србија е самостојна држава која сама го избира својот пат на развој. Но, тоа е земја со која имаме вистински партнерски односи што ни овозможуваат да ги разгледуваме и најтешките прашања“, изјави Песков.
Неговата изјава доаѓа откако портпаролката на руското Министерство за надворешни работи, Марија Захарова, оцени дека врз Србија се врши притисок да влезе во конфронтација со Русија.
„Гледаме како Србија постојано се вовлекува во конфронтација со Русија. Тоа се прави со притисоци и многу дрско“, изјави Захарова, додавајќи дека најважно е колку Србија ќе успее да се спротивстави на таквите притисоци.
