Рускиот министер за надворешни работи Сергеј Лавров го отфрли предлогот за 60-дневен прекин на огнот во Украина, оценувајќи дека таквата пауза би ѝ овозможила на земјата да се подготви за продолжување на војната. И портпаролот на Кремљ, Дмитри Песков, порача дека Москва би прифатила прекин на нападите само на денот кога би се одржале претседателските избори во Украина.
Реакциите од Москва следуваат откако украинскиот претседател Володимир Зеленски изјави дека 60-дневно примирје би овозможило одржување претседателски избори. Тој, сепак, посочи дека изборите во сегашните услови се речиси невозможни од безбедносни причини, бидејќи нападите се случуваат и дење и ноќе.
Според украинскиот устав, избори не можат да се одржат додека во земјата е во сила воената состојба.
Лавров оцени дека за време на прекинот на огнот европските земји би можеле да ја снабдуваат Украина со дополнително оружје, со што таа би добила можност да ја продолжи војната.
![]([{"src":"https://fls-a0a6331f-aa52-4911-bb98-f749c6b695c6.laravel.cloud/ads/01M3Z9362YEBRCB1FZM7W2K91B.gif","chance":50,"url":"https://www.loto.mk"},{"src":"https://fls-a0a6331f-aa52-4911-bb98-f749c6b695c6.laravel.cloud/ads/01M3Z937P7C633CS99SP77A7TT.gif","chance":10,"url":"https://www.loto.mk"},{"src":"https://fls-a0a6331f-aa52-4911-bb98-f749c6b695c6.laravel.cloud/ads/01M3Z9399AWTQYS76JTASHNB6Z.gif","chance":10,"url":"https://www.loto.mk"},{"src":"https://fls-a0a6331f-aa52-4911-bb98-f749c6b695c6.laravel.cloud/ads/01M3Z93AQ8NFSC3JGHXF78CANS.gif","chance":10,"url":"https://www.loto.mk"},{"src":"https://fls-a0a6331f-aa52-4911-bb98-f749c6b695c6.laravel.cloud/ads/01M3Z93C62E7Z98JRQG22HQ1ZQ.gif","chance":10,"url":"https://www.loto.mk"},{"src":"https://fls-a0a6331f-aa52-4911-bb98-f749c6b695c6.laravel.cloud/ads/01M3Z93DN7FVZHTTP5AWCCK8DP.gif","chance":10,"url":"https://www.loto.mk"}])
„Зеленски ќе употреби какви било зборови, какви било иницијативи, за да добие пауза. Не мислам дека тој го заслужува тоа. Нема повторно да наседнеме на тие уверувања и ветувања“, изјави Лавров.
Песков, пак, рече дека рускиот претседател Владимир Путин би бил подготвен да нареди прекин на нападите врз Украина на денот на изборите, доколку Киев навистина сака да организира гласање.
„Ако навистина сакаат да одржат избори, Владимир Путин ќе биде подготвен да издаде наредба да не се изведуваат напади врз Украина на денот на изборите“, изјави Песков.
Тој додаде дека 60-дневното примирје, предложено од Зеленски, би ѝ овозможило на Украина да ги залечи последиците од војната и потоа да продолжи со борбите.
Во меѓувреме, американскиот претседател Доналд Трамп вчера објави дека Русија и Украина се договориле за енергетско примирје, но Москва досега не го коментирала тоа. Зеленски, пак, изјави дека Русија денеска нападнала шест енергетски објекти низ Украина.
