Тројца млади од Скопје осомничени дека нападнале 14-годишник со нож

Секторот за внатрешни работи Скопје поднесе кривична пријава до Основното јавно обвинителство Скопје против Ј.Ј. (19), В.С. (23) и В.А. (19), сите од Скопје, поради сомнение дека го сториле кривичното дело „насилство врз дете“ согласно член 201-а од Кривичниот законик.

— реклама —

Според информациите од МВР, на 22 јуни годинава, околу 23:50 часот, на улицата „Финска“, во парк, тројцата осомничени физички нападнале 14-годишен малолетник. При нападот употребиле тврд предмет, а со остар предмет му нанеле повреди.

— реклама —

— реклама —

Полициски службеници излегле на местото на настанот, каде што бил пронајден ножот за кој се сомнева дека бил употребен при извршувањето на делото. Ножот е одземен и предаден на вештачење.

По преземените мерки, осомничените биле лишени од слобода, по што со нив бил извршен службен разговор. По целосното документирање на случајот, против нив е поднесена кривична пријава.