Градоначалникот на Скопје, Орце Ѓорѓиевски, соопшти дека Кризниот штаб на Град Скопје, заедно со јавните претпријатија и надлежните служби, е целосно мобилизиран по силното невреме што попладнево го зафати главниот град.
Тој информира дека е воспоставена постојана координација со Центарот за управување со кризи, Министерството за внатрешни работи, ЕВН, Противпожарната бригада на Град Скопје и останатите надлежни институции, со цел брза и навремена интервенција на сите критични локации.
Според Ѓорѓиевски, сите расположливи капацитети се ставени во функција за заштита на граѓаните и за спречување на поголеми штети и последици од невремето.
Тој најави дека екипите на Град Скопје ќе останат на терен во текот на целата ноќ и ќе интервенираат секаде каде што ќе има потреба.
Градоначалникот ги повика граѓаните на кои им е потребна помош или имаат потреба да пријават штета или друга итна состојба, да се јават на телефонскиот број 112 или на бројот +389 72 314 929.
Во својата објава, Ѓорѓиевски апелира до граѓаните да останат внимателни и смирени, да ги следат препораките на надлежните институции и да соработуваат со службите кои се на терен.
