Крузерот „Ем-Ви Хондиус“, погоден од епидемија на хантавирус, денеска треба да пристигне во Ротердам, каде што ќе биде извршена дезинфекција на бродот.
Холандските власти подготвуваат карантински аранжмани за 25 членови на екипажот и двајца медицински работници кои останале на бродот.
Локалните власти соопштија дека за дел од екипажот кој не е холандски државјанин се обезбедени карантински објекти, иако сè уште не е јасно дали таму ќе останат во текот на целиот препорачан карантин од 42 дена.
Луксузниот крузер под холандско знаме превезувал 150 патници и членови на екипажот од 23 земји кога на 2 мај Светската здравствена организација првпат била известена за група тешки респираторни заболувања меѓу патниците.
Од почетокот на епидемијата починале три лица – холандска двојка и германски државјанин.
Бродот, управуван од компанијата „Океанвајд Експедиции“, претходно бил блокиран кај Зеленортските Острови, откако локалните власти забраниле искрцување на патниците поради ширењето на заразата.
Светската здравствена организација и Европската Унија побарале од Шпанија да ја координира евакуацијата на патниците на Канарските Острови, по што крузерот испловил кон Ротердам со основниот екипаж и двајца дополнителни медицински работници.
Хантавирусот најчесто го пренесуваат глодари, но во ретки случаи може да се пренесе и меѓу луѓе по подолг близок контакт. Инкубацијата може да трае околу шест недели.
Екипажот, патниците кои веќе го напуштиле бродот и лицата кои биле во контакт со нив се ставени во карантин во повеќе држави низ светот.
Светската здравствена организација во петокот го намали бројот на случаи од 11 на 10, откако еден тест во САД бил негативен.
Сепак, властите во канадската провинција Британска Колумбија во саботата соопштија дека уште еден канадски патник од „Хондиус“ е позитивен на хантавирус.
Од СЗО порачаа дека се очекуваат дополнителни случаи поврзани со епидемијата, но нагласија дека ситуацијата не е споредлива со пандемијата на ковид-19 и не претставува глобална пандемија.
