Три лица загинаа, а петмина се повредени во пукање што се случило во средно училиште во централниот дел на Филипините, соопшти филипинската полиција.
Инцидентот се случил во Националното средно училиште „Сан Хозе“ во градот Таклобан, кој се наоѓа во покраината Лејте. Според информациите на полицијата, по нападот биле уапсени двајца осомничени.
Пукањето се случило околу 9 часот наутро по локално време, а истрагата за утврдување на сите околности сè уште е во тек.
Началникот на полицијата Ноелито Гетиган изјавил дека напаѓачите користеле огнено оружје од калибар 0,38 и пиштол од 9 милиметри.
Еден од осомничените, кој е малолетен ученик во училиштето, бил уапсен кратко по инцидентот, додека вториот подоцна сам им се предал на властите.
Повредените веднаш биле пренесени во блиските болници за укажување медицинска помош.
По нападот, полицијата распореди дополнителни безбедносни сили во училиштето со цел да се гарантира безбедноста на учениците, наставниот кадар, родителите и локалната заедница.
Надлежните апелираа до јавноста да не шири непроверени информации и да соработува со истражните органи во расветлувањето на случајот.
