Во текот на август, ЈП „Лајка“ заловило 101 бездомно куче на територијата на Скопје, што е повеќе од вкупно 86 пријави што ги поднеле граѓаните. Во истиот период, 19 кучиња биле вдомени, меѓу кои и шест што со години престојувале во стационарот.
Најголем број кучиња биле заловени и третирани во Општина Ѓорче Петров – 20, иако биле поднесени 14 пријави. Во Кисела Вода и Гази Баба биле третирани по 15 кучиња, во Чаир 14, додека во Бутел и Шуто Оризари по 10. Во Аеродром и Центар биле опфатени по шест, а во Карпош пет кучиња.
Ветеринарниот сектор во август извршил 103 зафати за репродуктивна контрола – 70 стерилизации на женски кучиња и 33 кастрации на мажјаци. Од „Лајка“ посочуваат дека поголемиот број стерилизации на женките има значаен ефект врз спречувањето на неконтролираното размножување.
Сите заловени кучиња биле ветеринарно прегледани, третирани, вакцинирани против беснило и микрочипирани. По завршувањето на третманот, 66 кучиња биле вратени на нивните матични локации.
Од 19-те реализирани вдомувања, шест биле кучиња што со години живееле во стационарот. Арон, Џин, Волтер, Чоко, Руди и Даре во првата половина на август добиле траен дом.
„Лајка“ воедно започнала партнерство со „Волт Македонија“, преку кое граѓаните можат директно да донираат средства. Од претпријатието велат дека и понатаму има потреба од привремени згрижувачи, а за донации на опрема, ќебиња и садови за храна поставени се кутии во „Дајмонд“, „Ист гејт“ и „Сити мол“.
