ЈП „Лајка“ Скопје со порака до граѓаните ги повика да не ги отфрлаат кучињата од прифатилиштето поради нивното минато, туку да им дадат шанса да покажат какви се денес.
„Не сакам куче од прифатилиште. Кој знае зошто завршило таму…“, се наведува како една од честите причини поради кои луѓето се двоумат да вдомат куче од прифатилиште.
Од „Лајка“ посочуваат дека најчесто причината поради која кучето завршило во прифатилиште не е тоа што направило нешто погрешно. Некои биле напуштени, други никогаш немале дом, а дел од нив едноставно се родиле на улица.
Оттаму нагласуваат дека нивното минато не значи дека станува збор за „проблематични“ кучиња и упатуваат апел при изборот да не се гледа само од каде доаѓа кучето, туку какво е тоа денес.
„Запознај го и види кое е денес“, порачуваат од ЈП „Лајка“.
Од претпријатието додаваат дека можеби токму кучето за кое некој се прашува „кој знае зошто завршило таму“ е она што чека да најде свој дом.
