УЕФА изрече високи парични казни за два хрватски клуба поради инциденти предизвикани од нивните навивачи во плеј-офот од квалификациите за Конференциската лига.
Највисока казна доби Хајдук, кој ќе мора да плати вкупно 56.000 евра поради случувањата на натпреварот против полскиот Раков во Сплит, одигран на 20 август и завршен со резултат 2:2.
Дисциплинската комисија на УЕФА го казнила клубот поради употреба на ласери, фрлање предмети на теренот, блокирање на премините и користење пиротехнички средства. Во одлуката се наведуваат и несоодветно однесување на екипата и груба игра.
Покрај паричната казна, Хајдук доби и условна санкција во траење од две години, која предвидува делумно затворање на трибините на следниот натпревар во европските натпреварувања доколку клубот повторно направи прекршок.
Казна доби и Ријека. Хрватскиот клуб ќе плати 32.750 евра поради инциденти поврзани со неговите навивачи на гостувањето кај данскиот Митјиланд.
Натпреварот се одигра на 20 август, а Митјиланд славеше со 2:0.
Со двете одлуки, УЕФА им изрече на хрватските клубови вкупни парични казни од 88.750 евра.
