Претседателот на ФИФА, Џани Инфантино, се соочува со нови проблеми откако УЕФА најави можни правни мерки поради пропаднатиот план за формирање на компанијата „ФИФА Форвард Ентерпрајз“ (FFE), а Англија и Велс ја повлекоа поддршката за негов реизбор.
Според британскиот „Телеграф“, УЕФА испратила писма до Инфантино и до други лица поврзани со проектот, меѓу кои и американскиот инвеститор Џошуа Кушнер, барајќи да не се уништуваат документи и електронски записи поврзани со планот.
Во писмото се наведува дека УЕФА активно разгледува можност за покренување правни постапки, арбитража и обраќање до надлежните регулатори.
Планот, претставен на 28 јули, предвидуваше формирање нова компанија која ќе ги обедини комерцијалните активности на ФИФА и продажба на удел на приватни инвеститори. По остриот отпор, особено од УЕФА, ФИФА во саботата соопшти дека се откажува од проектот.
Во меѓувреме, фудбалските асоцијации на Велс и Англија објавија дека повеќе не ја поддржуваат кандидатурата на Инфантино за нов мандат од 2027 до 2031 година.
Од Велшката фудбалска асоцијација порачаа дека претседателот на ФИФА ја изгубил нивната доверба поради, како што наведуваат, неуспеси во управувањето, лидерството, донесувањето одлуки и комуникацијата. Англиската фудбалска асоцијација, исто така, најави дека ќе испрати формално писмо со кое ќе ја извести ФИФА за својата одлука.
