Рускиот министер за надворешни работи Сергеј Лавров изјави дека, според него, вистинската цел на европските лидери не е постигнување договор со Русија, туку зачувување на власта на украинскиот претседател Володимир Зеленски и продолжување на поддршката за Украина во конфликтот со Москва.
Во авторски текст насловен „Украина, Европа и глобалната безбедност“, Лавров тврди дека европските земји се насочени кон зацврстување на позицијата на Зеленски и неговата администрација.
„Вистинската цел на европските лидери не е да преговараат со Русија. Нивната намера е да го зацврстат режимот на Зеленски и да го зачуваат како отскочна штица за продолжување на конфликтот против Русија“, наведува Лавров во текстот.
Според руската државна агенција ТАСС, написот требало да биде објавен во бриселското издание на „Политико Европа“, но редакцијата во последен момент се откажала од неговото објавување.
Лавров во текстот ја критикува политиката на европските држави кон војната во Украина и ја обвинува Европа дека, наместо да работи на дипломатско решение, продолжува да ја поддржува украинската страна во конфликтот.
Изјавите на шефот на руската дипломатија доаѓаат во период кога меѓународните напори за изнаоѓање решение за војната во Украина остануваат без конкретен напредок, а односите меѓу Москва и западните земји се и натаму силно затегнати.
