Почетокот на издржувањето на затворската казна на поранешниот градоначалник на Општина Карпош, Стевчо Јакимовски, е одложен поради неговото барање поднесено од здравствени причини.
Како што информираат од Судот, Јакимовски уште на 12 јуни побарал одложување на извршувањето на казната, повикувајќи се на својата здравствена состојба.
Судот побарал дополнителни информации за неговата моментална здравствена состојба од двете приватни здравствени установи што Јакимовски ги навел во барањето, но досега не добил одговор. Поради тоа, на 26 јуни судијата испратил и ургенција до здравствените институции.
Одлуката дали и за колкав период ќе биде одложено издржувањето на казната ќе биде донесена откако судот ќе ја добие и разгледа целокупната медицинска документација. Дотогаш, почетокот на отслужувањето на казната останува одложен.
Јакимовски е правосилно осуден на една година затвор за незаконска изградба на општинската зграда во Карпош. Во казната ќе му бидат пресметани и петте месеци што ги помина во куќен притвор.
