Врховниот суд ги укина пресудите на Основниот кривичен суд Скопје и на Апелациониот суд Скопје во предметот против Стевчо Јакимовски и го врати случајот на повторно постапување и одлучување пред првостепениот суд.
Советот за казниви дела на седница одржана на 9 септември го уважил барањето на Јакимовски за вонредно преиспитување на правосилната пресуда, поднесено преку неговиот бранител, адвокатот Виктор Цветковски од Куманово.
Со пресудата КВП КОК2-18/26, Врховниот суд ја укинал пресудата на Основниот кривичен суд Скопје КОК-157/21 од 23 април 2025 година, како и пресудата на Апелациониот суд Скопје КОКЖ-110/25 од 15 мај 2026 година.
Предметот сега повторно се враќа пред Основниот кривичен суд Скопје, кој ќе треба одново да постапува и да одлучува.
Јакимовски во април 2025 година првостепено беше осуден на единствена казна од три години и шест месеци затвор за две кривични дела – бесправно градење и злоупотреба на службената положба и овластување, во предмет поврзан со изградбата на административниот објект на Општина Карпош.
За бесправното градење му беше утврдена казна од една година, а за злоупотребата на службената положба три години затвор.
Првостепениот суд тогаш одлучи и административниот објект на локалната самоуправа на улицата „Радика“ бр. 9 да биде одземен во корист на државата. Во единствената затворска казна на Јакимовски требаше да му биде засметано и времето поминато во куќен притвор.
Апелациониот суд во мај годинава делумно интервенираше во првостепената одлука. Беше потврдена едногодишната затворска казна за бесправно градење, додека во делот за злоупотреба на службената положба предметот беше вратен на повторно судење.
По правосилноста на делот за бесправното градење, Јакимовски доби упатен акт да се јави на издржување на казната во затворот „Скопје“.
Сега, со најновата одлука, Врховниот суд ги укинува и првостепената пресуда од 2025 година и пресудата на Апелациониот суд од 2026 година, а предметот го враќа на повторно постапување пред првостепениот суд.
