Поранешниот градоначалник на Карпош, Стевчо Јакимовски, е надвор од животозагрозувачка состојба, но останува задржан во болница по извршената операција, дознава „Скопје1“.
Според информациите до кои дојде „Скопје1“, Јакимовски бил пренесен од КПУ „Затвор Скопје“ во приватна болница, каде што бил опериран. Неговата состојба сега е стабилна, но по операцијата останува на болничко лекување.
Јакимовски претходно бил хоспитализиран во Клиничката болница „Аџибадем Систина“ од 5 до 26 август поради здравствени тегоби, што за „Скопје1“ го потврди директорот на КПУ „Затвор Скопје“, Бобан Утковски.
„На 5 август 2026 година, по претходно искажани здравствени тегоби и жалби од негова страна, тој беше хоспитализиран во Клиничката болница „Аџибадем Систина“, каде што му беше овозможен соодветен медицински третман и здравствена грижа“, изјави Утковски.
По завршувањето на тогашниот болнички третман, на 26 август Јакимовски бил вратен во КПУ „Затвор Скопје“. Од установата не соопштија детали за неговата дијагноза или конкретната здравствена состојба, повикувајќи се на доверливоста на медицинските податоци.
„Како институција, наша обврска е кон секое лице кое се наоѓа во установата да постапуваме одговорно и човечки и, секогаш кога постои медицинска потреба, навремено да му овозможиме соодветна здравствена заштита“, вели Утковски.
Тој додава дека институцијата постапила согласно со своите надлежности и медицинските препораки.
„Здравјето и човечкото достоинство мора да бидат почитувани без исклучок“, порача Утковски.
Јакимовски е правосилно осуден на една година затвор за незаконската изградба на општинската зграда во Карпош. Во казната ќе му бидат пресметани и петте месеци што ги помина во куќен притвор.
