Левица: Депонијата во Арачиново гори, институциите бегаат од одговорност, а граѓаните дишат отров

Левица преку соопштение реагира на повторното избувнување пожар на депонијата во Арачиново, од каде што чадот се шири кон Скопје, обвинувајќи ги надлежните институции за неефикасност и избегнување одговорност.

— реклама —

Од партијата наведуваат дека со месеци се повторува истото сценарио – отпадот гори, граѓаните се изложени на чад, а институциите не преземаат соодветни мерки за решавање на проблемот. Според Левица, ваквата состојба претставува долготраен институционален неуспех за кој никој не одговара.

Партијата посочува дека граѓаните пријавуваат чад, печење во грлото и носот и солзење на очите, додека институциите ги упатуваат од една служба кон друга. Според нивните наводи, Центарот за управување со кризи ги советува граѓаните да се обратат до медиумите, Општината ги упатува до комуналното претпријатие, а од претпријатието тврдат дека случајот е пријавен.

— реклама —

Левица бара итно гаснење на пожарот и вклучување на сите надлежни служби, утврдување кривична одговорност за институционалната негрижа и транспарентно, постојано следење на квалитетот на воздухот.

— реклама —

Од партијата бараат и итна санација на депонијата, трајно решавање на проблемот и санкционирање на одговорните за незаконско или неконтролирано одлагање на отпад.

Според Левица, случајот во Арачиново е уште еден показател за поширокиот проблем со дивите депонии и несоодветното управување со отпадот во Македонија. Наместо организиран систем за собирање, селекција и безбедно третирање на отпадот, како што наведуваат, граѓаните се соочуваат со неконтролирани депонии, пожари и загадување на воздухот, почвата и водите.

Од партијата предупредуваат дека ваквите состојби претставуваат закана за животната средина и јавното здравје, особено кога институциите реагираат дури откако ќе настане штетата.