Левица ги повика ДПМНЕ и СДСМ веднаш да ги делегираат своите членови во Анкетната комисија за случајот „Пулс“, обвинувајќи ги двете партии дека со меѓусебни политички калкулации го одложуваат нејзиното функционирање.
Од Левица велат дека е срамно што родителите на загинатите во „Пулс“ мора повторно да бараат да проработи Комисијата, која била изгласана уште на 3 декември 2025 година.
„Фактот што девет месеци подоцна таа сè уште не функционира кажува многу“, наведуваат од партијата, оценувајќи дека државата полесно се навикнува на трагедијата отколку што ги отвора механизмите што довеле до неа.
Од Левица сметаат дека ДПМНЕ има интерес да не се отвораат актуелните институционални пропусти поврзани со „Пулс“, додека СДСМ има причина случајот со Модуларната болница да остане подалеку од политичка расправа.
Анкетната комисија ги опфаќа случаите „Пулс“, Модуларната болница, „Беса транс“ и Ласкарци.
„Кога взаемното молчење им користи, дилот станува многу поудобен од реформата“, се наведува во реакцијата.
Од Левица потсетуваат дека единствено тие предложиле член и заменик-член во Анкетната комисија. Според партијата, по трагедиите не е доволно само да се утврдуваат одговорностите, туку мора да се менува и начинот на функционирање на институциите.
„Ако дозволите се издаваат по истата логика, контролите остануваат формални, инспекциите се сведуваат на административна рутина, ако службеникот може да потпише без реална проверка и ако никој политички не плаќа цена за (не)надзорот, тогаш не сме исправиле ништо“, велат од Левица.
Партијата посочува и дека Собранието не ги усвоило заклучоците предложени по седницата на Постојаната анкетна комисија за заштита на слободите и правата на граѓанинот, со која претседава Димитар Апасиев.
Од Левица повторно ги повикуваат ДПМНЕ и СДСМ да ги делегираат своите претставници и да престанат, како што велат, да ја држат Анкетната комисија како заложник на меѓупартиски калкулации.
„Ако и по 63 загинати млади луѓе во Кочани и 14 жртви во Модуларната, за вас сè уште е поважно кој кого ќе заштити отколку што мора да се промени, сметаме дека местото не ви е во Собранието и управувачките, одлучувачките фотелји“, порачаа од Левица.
