Левица до Муцунски: „Македонија да гласа за Куба, престанете да ја изолирате државата“

Левица побара Македонија да ја поддржи резолуцијата на Генералното собрание на Обединетите нации за укинување на американското ембарго врз Куба, за која гласањето е најавено за 28 октомври. Од партијата го повикуваат министерот за надворешни работи Тимчо Муцунски да ја промени позицијата од минатата година, кога Македонија гласаше против резолуцијата.

Според Левица, гласањето во 2025 година претставувало преседан во македонската дипломатија, бидејќи земјата претходно со децении го поддржувала барањето за укинување на ембаргото.

— реклама —

„Го повикуваме Министерството за надворешни работи во пресрет на гласањето во Генералното собрание на ОН за резолуцијата со која се повикува на укинување на американското ембарго врз Куба, а кое е закажано за 28 октомври 2026 година, да гласа „за„ нејзино усвојување“, соопштија од Левица.

Партијата наведува дека минатата година Македонија гласала против резолуцијата заедно со САД, Израел, Парагвај, Аргентина, Унгарија и Украина. Според нив, со таквата одлука државата се оддалечила од својата дотогашна дипломатска практика и од позициите што ги застапувала во рамките на европските интеграции.

— реклама —

Од Левица оценуваат дека министерот Муцунски води надворешна политика која не е во согласност со декларираната определба за членство во Европската Унија.

„Во период кога Република Македонија самата се соочува со дипломатски предизвици, кусогледиот Муцунски нема право да повлекува авантуристички и антиевропски потези и да ја турка земјата во уште поголема неизвесност“, се наведува во партиското соопштение.

Левица посочува дека резолуцијата за Куба традиционално добива широка меѓународна поддршка, вклучително и од држави членки на Европската Унија и од повеќе регионални организации.

— реклама —

Партијата се осврнува и на хуманитарната состојба во Куба, тврдејќи дека американските санкции придонесуваат за недостиг на храна, гориво, електрична енергија и други основни потреби.

Според Левица, Македонија не треба автоматски да ги следи надворешнополитичките позиции на САД, туку да носи одлуки врз основа на сопствените интереси и меѓународните принципи.

„Затоа најавеното гласање не смее да биде уште едно механичко повторување на туѓи политички позиции. На Македонија ѝ се потребни сојузници, меѓународен кредибилитет и принципиелна дипломатија, а не напуштање на воспоставените позиции“, порачуваат од партијата.

Од Левица сметаат дека гласањето на 28 октомври ќе биде можност Македонија да се врати на претходната позиција за укинување на ембаргото врз Куба и да покаже поголема самостојност во надворешната политика.