Левица: Јаневска сфати дека со лажење не оди, па сега молчи пред сопствениот правилник - бодови нема и останува некој конечно да сноси одговорност за партизирање и на студентските домови

Левица преку соопштение повторно побара од Министерството за образование и наука да ги објави бодовите врз основа на кои биле рангирани студентите за сместување во студентските домови, оценувајќи дека без оваа информација јавноста не може целосно да ја провери постапката.

Од партијата велат дека доколку студентите биле рангирани според пропишани критериуми, мора да постои и соодветна бодовна листа. Според нив, тоа произлегува и од Законот за студентски стандард, но и од Правилникот потпишан од министерката за образование и наука Весна Јаневска, со кој е предвидено јавно објавување на списокот на студентите со освоените бодови.

— реклама —

Левица посочува дека досега биле објавени списоци на примени и непримени студенти, но без податоци за освоените бодови. Од партијата сметаат дека токму бодовите се клучни за проверка дали рангирањето било спроведено според утврдените критериуми.

— реклама —

Од Левица прашуваат дали оваа година воопшто било спроведено бодирање за сместувањето во студентските домови и бараат надлежните институции да извршат увид во целокупната документација.

„Ако бодувањето постои, ова е најлесниот скандал што Јаневска може да го затвори“, велат од партијата, од каде што додаваат дека наместо објавување на бодовите, Министерството досега ги отфрлало критиките како лажни вести.

— реклама —

Како дополнителен аргумент, Левица ја посочува и ревизорската документација од претходен конкурс. Според партијата, Државниот завод за ревизија тогаш не добил поткрепувачка документација дека Министерството за образование и наука извршило бодирање, при што било укажано дека неприменувањето на бодовното рангирање може да создаде простор за субјективност при распределбата.

Левица бара да се утврди дали за секој кандидат постои целосна бодовна пресметка, кога и од кого е извршена, според кои критериуми и дали конечната листа произлегува од утврдените бодови.

Од партијата велат дека објавените списоци без бодови не овозможуваат целосна јавна проверка на постапката и бараат документацијата да биде достапна за да се отстранат сомнежите околу начинот на кој биле распределувани местата во студентските домови.