Левица ќе достави фотографии до Антикорупциската комисија во предметот за „Сити Аутсорсинг“ и директорот на СОЗР, Ивица Томовски

Антикорупциската комисија, која веќе отвори предмет за случајот со фирмата „Сити Аутсорсинг“, ќе добие нови материјали од Левица. Партијата најави дека ќе достави фотографии за кои тврди дека укажуваат на поврзаност меѓу директорот на СОЗР, Ивица Томовски, и управителот на компанијата, откако Томовски одбил да одговори дали станува збор за негов личен пријател.

— реклама —

Според Левица, „Сити Аутсорсинг“ добила околу 5 милиони евра државни средства преку тендери, а управителот на компанијата е лице кое на социјалните мрежи има објавено бројни фотографии со Томовски. Партијата оценува дека ова отвора прашања околу потенцијална поврзаност и улогата на управителот во фирмата, која претходно, како што наведуваат, била во сопственост на семејството на Томовски.

— реклама —

— реклама —

Од Левица потсетуваат и дека компанијата претходно се именувала „Сити Логистик“, а како таква добивала тендери вредни околу 60.000 евра во периодот кога сегашниот премиер Христијан Мицкоски бил директор на ЕЛЕМ. Според нив, Јавното обвинителство треба да утврди како фирма во која, како што тврдат, Томовски имал управителска функција во минатото, а тендери биле доделувани од Мицкоски, денес стигнува до државни договори од 5 милиони евра.

Партијата најави дека ќе ја достави целата документација што ја поседува за случајот, оценувајќи ја компанијата како „контроверзна“ и дека, според нив, постои сомневање за злоупотреби на државни средства. Левица критикува дека ОЈО не отвора постапки поврзани со компании во кои, како што наведуваат, се инволвирани лица блиски до премиерот, што го толкуваат како индикатор на политичко влијание врз правосудството.