Левица: Клеветите на Филипче и Мицкоски не ја менуваат нашата позиција

Левица реагира на последните изјави на лидерите на СДСМ и ВМРО-ДПМНЕ, Венко Филипче и Христијан Мицкоски, оценувајќи дека нивните обвинувања не ја менуваат позицијата на партијата.

Во реакцијата се посочува дека присуството на Левица на јавната трибина „Што по 35 години?“, преку учеството на портпаролот Амар Мециновиќ, според партијата, го нарушило политичкиот простор во кој со децении функционираат СДСМ и ВМРО-ДПМНЕ.

— реклама —

Од Левица велат дека Мицкоски се обидува да ја смести партијата во политичката орбита на СДСМ, додека Филипче ја претставува како сателит на ВМРО-ДПМНЕ.

„Во таа упорна противречност се наоѓа и најдобриот одговор на двајцата: толку се навикнати секоја политичка сила да биде нечија, што не можат да прифатат дека Левица е своја и автентична како производ на времето“, наведуваат од партијата.

— реклама —

Од Левица додаваат дека по повеќе децении политика доминирана од двете најголеми партии, во Македонија се појавила политичка сила која, како што велат, не бара дозвола или легитимитет од нив.

— реклама —

Партијата во реакцијата ги обвинува СДСМ и ВМРО-ДПМНЕ за политички и корупциски афери и тврди дека Левица нема „политички долг“ кон други политички субјекти.

„Левица настана од непомиреноста со таквиот поредок и од одбивањето бедата и неправдата да се прифатат како судбина“, стои во реакцијата.

Од партијата додаваат дека нивната позиција нема да биде променета од, како што ги нарекуваат, „клеветите“ на Филипче и Мицкоски.

„Нивните клевети не нè допираат. Тежината на тие зборови зависи од кредибилитетот на оние што ги изговараат“, се наведува во соопштението на Левица.