Левица преку соопштение обвинува дека македонските оризопроизводители се соочуваат со загуби поради ниската откупна цена на оризовата арпа. Според партијата, производната цена изнесува околу 25 денари за килограм, додека откупот се движи меѓу 18 и 20 денари.
Од Левица посочуваат дека при вакви услови земјоделците не ги покриваат трошоците за гориво, семе, ѓубрива, препарати, вода, механизација и работна рака. Тие велат дека оризарите бараат реалната производна цена да се зголеми за 25 отсто, што би значело откупна цена од околу 31,25 денари за килограм.
Партијата оценува дека промената на министерот за земјоделство не донела промена во политиките кон оризопроизводителите. Од Левица потсетуваат дека уште во август земјоделците предупредувале на нискиот откуп, како и на растот на трошоците за гориво и репроматеријали.
Според нив, производителите го преземаат најголемиот дел од ризикот, додека државата не обезбедува доволно механизми за заштита од откуп под производната цена. Како решенија ги наведуваат јасните правила за откуп, транспарентна методологија за пресметка на производната цена, навремени интервентни мерки и механизми за спречување продажба под трошоците.
Од Левица ја посочуваат и пошироката состојба во земјоделството, наведувајќи примери со откупот на пиперки, пченица и млеко, каде, според нив, производителите исто така се соочуваат со ниски откупни цени и зголемени трошоци.
Партијата се повикува и на официјалната статистика, според која во јули 2026 година цените на земјоделските инпути пораснале за 4,1 отсто, додека цените на земјоделските производи паднале за 5,5 отсто.
Од Левица оценуваат дека ваквите движења го ставаат земјоделецот во неповолна економска положба и предупредуваат дека, според нив, продолжувањето на ваквите политики може да ја зголеми зависноста од увозна храна.
