Левица реагира на најавите за скратување на периодот на боледување што може да го утврдува матичен лекар и воведување дополнителни контроли кај болните работници, обвинувајќи ја власта дека наместо заштита на работничките права, врши дополнителен притисок врз вработените.
Од партијата велат дека директорот на Фондот за здравствено осигурување, Златко Перински, наместо да обезбеди навремена исплата на надоместоците и здравствена сигурност, подготвува мерки со кои, според нив, ќе се ограничат правата на работниците.
„Власта на ДПМНЕ очигледно смета дека најголемиот проблем во државата се работниците кои се разболуваат, а не институциите кои не си ги исполнуваат обврските“, наведуваат од Левица.
Партијата оценува дека скратувањето на боледувањето и дополнителните контроли би биле дополнителен товар за работниците, особено во услови кога, како што тврдат, многумина се соочуваат со несигурни работни места, ниски плати, притисоци од работодавачите и несоодветни услови за работа.
Од Левица прашуваат зошто не се преземаат мерки против работодавачите кои, според нив, ги принудуваат вработените да работат болни, не го почитуваат работното време или не обезбедуваат безбедност при работа. Наместо тоа, велат од партијата, се најавуваат контролори кои би проверувале дали работникот е дома за време на боледувањето.
Левица ја критикува и работата на Фондот во однос на исплатата на породилните надоместоци, посочувајќи дека породилките со месеци се соочуваат со доцнење на исплатите.
„Како може Фондот да најавува нови контроли врз работниците, кога не успева навремено да им ги исплати средствата што им следуваат?“, прашуваат од партијата.
Во реакцијата се упатуваат и критики кон Перински, при што од Левица тврдат дека закон бил менуван за тој да биде поставен на чело на Фондот. Од партијата го оспоруваат и неговото образование и упатуваат обвинувања поврзани со неговата магистерска диплома и случајот со дипломата на директорот на АНБ.
Од Левица велат дека граѓаните заслужуваат здравствен систем кој ќе им биде потпора кога се болни, а не механизам што ќе создава страв од санкции за време на боледување.
