Левица: СДС измисли нова „работничка политика” - народот да ги субвенционира газдите, а газдите да го собираат кајмакот

Левица преку соопштение го критикува предлогот на СДС за минимална плата од 600 евра, оценувајќи дека со него трошокот за зголемувањето на платите би паднал врз државата, наместо врз работодавачите.

— реклама —

Од партијата велат дека разликата меѓу сегашната минимална плата од 450 евра и предложените 600 евра би се покривала со јавни средства, односно со пари од даноците на граѓаните. Според Левица, тие средства би можеле да се искористат за изградба на болници, училишта, патишта, јавен превоз и друга инфраструктура.

Од партијата забележуваат и дека СДС не разговарал со синдикатите за предлогот. Според нив, во услови на постојан раст на синдикалната потрошувачка кошница, барањата за минимална плата од 600 евра веќе не одговараат на потребите на работниците, за кои синдикатите сметаат дека се потребни најмалку 800 евра.

— реклама —

Левица потсетува дека минатата година предложила минимална плата од 500 евра, во координација со синдикатите, како и низа мерки за подобрување на работничките права.

— реклама —

Меѓу предлозите се шестчасовен работен ден, регулирање на патните трошоци, исплата на платите најдоцна до петтиот ден во месецот и флексибилно работно време за родителите на деца до шест години. Партијата предложила и продолжување на породилното отсуство од девет на 18 месеци, заштита на работниот однос на бремените работнички и почитување на законското право на седум дена боледување без дополнителни сомнежи и проверки.

Според Левица, овие мерки треба да обезбедат повисок животен стандард, поголема сигурност на работното место и подобра заштита на работниците.

— реклама —

Партијата оценува дека разликите со СДС се однесуваат и на економскиот модел. Додека, според нив, СДС се залага за продолжување на приватизацијата и субвенционирање на приватните компании, Левица бара јавна контрола врз стратешките ресурси и економија насочена кон интересите на работничкото мнозинство.