Левица: Седуммина починати за едно лето - западнонилската треска однесе рекорден број жртви, а Институтот за јавно здравје го прекина неделното информирање за епидемијата

Левица преку соопштение ја обвини Владата дека не обезбедува навремено информирање за состојбата со западнонилската треска, откако бројот на починати во земјава достигна седум, а 19 пациенти и натаму се хоспитализирани.

Од партијата велат дека последниот официјален неделен извештај на Институтот за јавно здравје содржи податоци заклучно со 25 август, кога биле регистрирани пет смртни случаи. Според Левица, во меѓувреме бројот на починати се зголемил на седум, а има и нови сомнителни случаи.

— реклама —

„На ДПМНЕ очигледно му е полесно да престане да ја објавува статистиката отколку да објасни зошто Македонија за едно лето стигна до седум починати од западнонилска треска“, наведуваат од партијата.

Левица ја критикува и директорката на ИЈЗ, Марија Андоновска, од која бара редовно и навремено објавување на податоците за епидемијата. Од партијата посочуваат дека самиот ИЈЗ во своите материјали наведува оти неделно изработува епидемиолошки извештаи кои се објавуваат на веб-страницата на институцијата.

— реклама —

Од Левица прашуваат зошто во услови на зголемен број жртви нема нов официјален неделен пресек и велат дека јавноста не треба да зависи од повремени изјави на министерот за здравство Сашо Клековски.

— реклама —

Во соопштението се посочува и на нови угинати птици. Според Левица, во последните неколку дена биле пријавени повеќе од 130 угинати птици, а кај три гаврани – два во Скопје и еден во Ресен – бил потврден вирусот на западнонилска треска.

Партијата ја обвинува Владата и за недоволна превенција и контрола на комарците, посочувајќи на потенцијални жаришта како канали, запуштени водотеци и други места каде што може да се размножуваат комарци.

„Сега, кога резултатот од таа „превенција“ е седуммина починати за едно лето, институциите што требаше да ја следат и објаснуваат состојбата престануваат редовно да ја објавуваат статистиката“, наведуваат од Левица.

Од партијата оценуваат дека реакцијата на институциите е задоцнета и бараат поголема транспарентност за текот на епидемијата, превентивните мерки и нивните резултати.