Левица: Со бегството на Михаилова во Бугарија, Тошковски го дотера безбедносниот систем до дно - што ли договори Муцунски во Софија

Левица преку соопштение упати критики до министерот за внатрешни работи Панче Тошковски по информациите дека Ива Михаилова, обвинета за сообраќајна несреќа со смртни последици, се наоѓа во Бугарија, иако, според партијата, била на стоп-листа за напуштање на Македонија.

— реклама —

Од Левица посочуваат дека МВР соопштило оти во системот за гранична контрола нема евидентиран излез на Михаилова од државата. Партијата потсетува и дека нејзиниот татко, Симеон Михаилов, осуден на 13 години затвор за обид за убиство во случајот „Детонатор“, со години се наоѓа во Бугарија и не ја издржува затворската казна.

— реклама —

Од партијата сметаат дека овие случаи отвораат сериозни прашања за функционирањето на безбедносниот систем и способноста на институциите да ги спроведуваат судските мерки и да ја контролираат границата.

Левица повторно ја истакна и својата претходна интерпелација за Тошковски, наведувајќи дека со 17 точки ја образложила неговата политичка одговорност. Според партијата, последните случувања се дополнителен аргумент дека министерот треба да одговара за работата на МВР.

— реклама —

Во соопштението се отвораат и прашања за неодамнешната посета на министерот за надворешни работи Тимчо Муцунски на Софија, каде што се разговарало за македонско-бугарските односи и бугарското вето. Левица прашува дали постои поврзаност меѓу тие разговори и случајот со Михаилова, но не изнесува докази за таква поврзаност.

— реклама —

Од партијата оценуваат дека случајот ја доведува во прашање ефикасноста на институциите и бараат Тошковски да понесе одговорност за пропустите во безбедносниот систем.