Левица реагира на, како што велат, „расипничкото трошење на народни пари“ од страна на Владата за политичка промоција и мерење на рејтингот.
Од партијата посочуваат дека на 1 септември годинава Владата склучила договор вреден 21,2 милиони денари за видео продукција, фотографија и комуникациска кампања за владините проекти. Според Левица, договорот повторно го добила „Фрајдеј Комуникации“, компанија чиј сопственик, според јавно објавените податоци, е МК МЕДИЈА ГРУП ЕООД, регистрирана во Благоевград, Бугарија.
„ДПМНЕ, која гради патриотска реторика околу Бугарија, нема никаков проблем повеќе од 700 илјади евра македонски јавни пари да завршат во компанија со бугарски капитал кога станува збор за нивна промоција“, истакнува членот на Централниот комитет на Левица, Круме Богевски.
Од Левица додаваат дека ова не е единствениот случај на, како што велат, големи издвојувања за политичка промоција и мерење на рејтингот. Според партијата, во март 2025 година, само три дена по пожарот во Кочани, Владата склучила договор од 22,8 милиони денари за истражување на јавното мислење и мерење на сопствениот рејтинг.
„Сумирано, за нешто повеќе од една година Владата потрошила над еден милион евра народни пари за да се снима, фотографира, промовира и да проверува што мислат граѓаните за неа“, вели Богевски.
Од Левица ја критикуваат Владата и поради тоа што, според нив, за сопствена политичка промоција издвојува милионски суми, додека за други потреби на граѓаните се повикува на буџетски ограничувања.
„Народот плаќа Владата да биде снимена, народот плаќа Владата да биде фотографирана, народот плаќа кампања за да му се објасни колку добро работи Владата, а потоа истиот народ плаќа и анкети за Владата да провери дали успеала да го убеди“, вели Богевски.
Од партијата како пример го посочуваат и студентскиот оброк, за кој, според нив, и годинава се определени 140 денари, како и издвојувањата за социјалните мерки, земјоделците, јавните услуги и инфраструктурата.
Левица го споменува и случајот со онколошките пациенти, за кои тврди дека пред неколку недели биле принудени да бараат КТ-снимања во приватни установи, по цена од околу 1.300 евра за снимање, поради нефункционалност на единствениот државен апарат.
„Мицкоски совршено покажува како изгледа држава во која за основна јавна услуга граѓанинот мора да се снаоѓа, додека за политичка презентација тендерите продолжуваат без никаков проблем“, додава Богевски.
Од Левица велат дека кога една власт троши повеќе од еден милион евра за снимање, промоција и мерење на јавното мислење, наместо за решавање на причините за незадоволството, народните пари се користат за, како што наведуваат, „менување на сликата за реалноста“.
„Народот нема обврска да го финансира стравот на една власт која очигледно веќе не е сигурна дека народот верува“, заклучува Богевски.
