Левица: „Запирање на имигрантските визи од САД - стратешки шамар за домашните вазали“ 

Партијата Левица ја обвини Владата дека со својот, како што наведуваат, вазалски однос кон САД директно придонела за одлуката да се запре постапката за издавање имигрантски визи за македонските граѓани.

— реклама —

Во соопштението, партијата тврди дека актуелната власт со години градела илузија за наводно „стратешко партнерство“ со Вашингтон, но дека реалноста покажала отсуство на каква било вистинска поддршка. Според Левица, надворешната политика на Владата се свела на симболични средби и фотографии со американски функционери без влијание врз клучните одлуки.

— реклама —

Партијата потсетува дека на запирањето на визите му претходело воведување трговски маржи и царини од страна на САД, по што Владата, како што се наведува, „во немоќ и коленичење“ одлучила целосно да ги укине царините кон американските производи.

Левица ја критикува и серијата надворешнополитички потези на власта – гласањето против укинувањето на санкциите кон Куба, поддршката на американските резолуции за Украина и ставовите околу Венецуела – оценувајќи дека тие го нарушуваат угледот на Македонија без да донесат каква било корист.

— реклама —

„Мицкоски и Муцунски не можат да научат дека вазалскиот однос кон САД не е и не може да биде стратешко партнерство“, се наведува во соопштението.

— реклама —

Според Левица, ваквата политика ја внесува државата во „стратешки ќорсокак“, а излезот го гледаат во промена на надворешнополитичкиот курс и отворање кон други глобални партнери. Партијата заклучува дека актуелната власт нема капацитет за таков пресврт и дека последиците ги трпат граѓаните.