Личната карта и возачката дозвола на мобилен телефон: на 28 октомври се промовира апликацијата м.Услуги

Граѓаните наскоро ќе можат преку мобилен телефон да пристапуваат до електронска верзија на личната карта и возачката дозвола, како и до државни услуги. Министерот за дигитална трансформација, Стефан Андоновски, најави дека официјалната промоција на мобилната апликација м.Услуги ќе се одржи на 28 октомври во Македонската филхармонија.

На настанот ќе се обрати и премиерот Христијан Мицкоски, кој ќе ги претстави насоките и приоритетите за дигитализација на државата.

— реклама —

„Промоцијата официјално можам да ја најавам на 28 октомври во Македонската филхармонија. Ќе ја промовираме мобилната апликација м.Услуги, јас ќе ги презентирам изгледот и функционалностите, а претседателот на Владата ќе говори пошироко за тоа каде се движиме во поглед на дигитализацијата“, истакна Андоновски.

Апликацијата е во завршна фаза на тестирање и ќе биде достапна преку Google Play и App Store. Граѓаните ќе можат да се најават со профилот што го користат на Националниот портал за електронски услуги uslugi.gov.mk и да пристапат до своите податоци.

— реклама —

Покрај електронската лична карта и возачката дозвола, во почетната фаза м.Услуги ќе понуди и три услуги. Андоновски нагласи дека преземањето ќе биде бесплатно, а користењето доброволно.

„Ова ќе биде наш прв чекор кон дигиталниот паричник. Апликацијата е бесплатна за преземање и не е задолжителна, но ќе нуди многу нови погодности. Ќе го свртиме фокусот кон тоа државата да биде достапна на мобилниот телефон, односно на дланка“, порача министерот.

— реклама —

Во план е апликацијата постепено да се надградува со дополнителни документи и услуги. Андоновски информираше дека се разговара со Министерството за здравство за вклучување податоци од м.Здравје, како и со Министерството за социјална политика, демографија и млади за европската младинска картичка.

Прифаќањето на електронските документи во институциите ќе се одвива постепено, со приспособување на подзаконските акти и зајакнување на капацитетите. Министерот посочи дека за прифаќањето на други електронски документи досега биле направени измени во околу 100 закони.

„Европската унија бара задолжително користење на дигиталниот паричник од 2027 година. Кај нас нема задолжителна употреба, но во исто време ќе правиме напори институциите да започнат да ги прифаќаат електронските документи. Тоа ќе биде процес, бидејќи ќе треба да се менуваат и подзаконските акти. Чекор по чекор, како што ќе ги градиме капацитетите, така ќе се проширува и нивното прифаќање“, рече Андоновски.

Тој додаде дека досегашните реакции се позитивни и дека Министерството ќе продолжи да развива дигитални услуги што ќе им го олеснат секојдневието на граѓаните.