Што нуди апликацијата „м.Услуги“ и како ќе функционира дигиталниот паричник со лична карта и возачка дозвола

Граѓаните во Македонија од денеска ќе можат да ги користат личната карта и возачката дозвола во дигитална форма преку мобилниот телефон, со воведувањето на електронскиот паричник во апликацијата „м.Услуги“. Новата можност е дел од процесот на дигитализација на јавните услуги и треба да го олесни секојдневието, овозможувајќи побрза идентификација и поголема контрола врз личните податоци.

— реклама —

Електронскиот паричник не е банкарска апликација и не служи за чување пари, туку претставува дигитален простор за лични документи. Наместо физичката лична карта или возачката дозвола, граѓаните ќе можат да ги покажат потребните податоци преку мобилниот телефон.

Една од главните придобивки е можноста корисниците сами да изберат кои лични податоци ќе ги споделат при идентификација. Според министерот за дигитална трансформација Стефан Андоновски, податоците ќе се разменуваат преку кјуар-код за еднократна употреба, кој истекува по 10 до 15 секунди и не може повторно да се користи.

— реклама —

„Корисниците нема да мора да ги откриваат сите свои податоци, како што тоа го правиме сега кога ги покажуваме пластичните лични карти или возачките дозволи“, посочи Андоновски, нагласувајќи дека посебно внимание е посветено на безбедноста.

— реклама —

Воведувањето на дигиталните документи е прв чекор кон поширока дигитализација на државните услуги. Во наредниот период се планира електронскиот паричник да добие дополнителни документи и функционалности, со цел граѓаните да имаат полесен пристап до услугите и да се намали потребата од административни постапки.

Слични решенија веќе се користат во повеќе европски земји, меѓу кои Естонија, Германија, Франција и Шпанија, каде што дигиталниот идентитет овозможува користење различни јавни и административни услуги. Европската Унија, исто така, работи на воспоставување единствен европски дигитален паричник.

Дигиталните документи вообичаено функционираат паралелно со физичките, а целта е да се овозможат побрза идентификација, полесно користење на услугите и поголема контрола врз личните информации.