Помалку шалтери, документи и побрзи услуги за граѓаните со м.Услуги, најави Мицкоски на промоцијата на апликацијата

Премиерот Христијан Мицкоски очекува новата мобилна апликација m.Uslugi да го олесни пристапот на граѓаните до јавните услуги, да го намали административниот товар и да го скрати времето потребно за завршување на постапките. Тој истакна дека дигитализацијата не значи само воведување нова технологија, туку и поедноставување на процедурите и поврзување на институциите.

Мицкоски посочи дека целта е граѓаните да немаат потреба да земаат слободен ден за да извадат документ, да чекаат пред шалтери или да носат документи од една во друга институција, особено кога потребните податоци веќе се достапни во државните регистри.

— реклама —

Според него, зад апликацијата стојат поврзани регистри, електронски услуги, механизми за дигитална идентификација и автентикација, законска рамка и сајбербезбедност. Тој нагласи дека дигитализацијата има вистинска вредност само ако им овозможува на граѓаните едноставно, брзо и безбедно да ги завршуваат своите обврски.

— реклама —

Мицкоски оцени дека поефикасните електронски услуги ќе донесат придобивки и за граѓаните и за компаниите, преку заштеда на време и намалување на непотребните трошоци. Истовремено, службениците ќе можат повеќе да се посветат на постапките за кои се неопходни човечка процена и одлучување.

Тој најави дека во следниот период се очекува значително проширување на бројот на услуги и документи достапни преку m.Uslugi, нагласувајќи дека проектот треба да го поддржат сите институции, а не само Министерството за дигитална трансформација.

— реклама —

Мицкоски се осврна и на реформите поврзани со европската интеграција, посочувајќи дека дел од обврските во рамките на Реформската агенда и Планот за раст на Европската Унија веќе се исполнети преку законски измени, развој на дигиталната инфраструктура и унапредување на електронските услуги.

Тој нагласи дека дигитализацијата не смее да создаде нови пречки за граѓаните кои немаат доволно дигитални вештини, поради што и понатаму ќе бидат потребни центри за услуги и други начини за поддршка.

Мицкоски му честиташе на министерот за дигитална трансформација Стефан Андоновски и на неговиот тим за реализацијата на проектот. Посочи дека успехот на апликацијата нема да се оценува според бројот на преземања, туку според бројот на завршени услуги, заштеденото време и намалувањето на административните постапки.