Новиот лидер на Хамас, Халил ал-Хаја, ги претстави шесте главни приоритети на организацијата во своето прво телевизиско обраќање откако беше избран за шеф на политичкото биро.
Како прва цел тој го посочи целосното запирање на израелската воена офанзива во Појасот Газа и повлекувањето на израелските сили од енклавата. Хамас е прогласен за терористичка организација од Европската Унија и други земји.
Ал-Хаја ги повика Египет, Катар, Турција и останатите посредници да извршат притисок врз израелската влада за спроведување на договорот за прекин на огнот од октомври 2025 година и преминување во неговата следна фаза. Имплементацијата на договорот со месеци е во застој, а двете страни меѓусебно се обвинуваат за негово прекршување.
Вториот приоритет, според него, е подобрување на условите за живот на Палестинците во Газа, со акцент на спречување на нивното раселување, забрзување на обновата и ослободување на затворениците.
Како трет приоритет Ал-Хаја го наведе постигнувањето на палестинското единство преку национален дијалог и обновување на палестинските институции, особено на Палестинската ослободителна организација (ПЛО), врз демократски основи и со широк консензус.
Меѓу останатите цели се зајакнување на односите со арапските и муслиманските држави, поттикнување на тие земји да преземат поконкретни чекори за запирање на израелските напади во Газа, како и повик до Обединетите нации и меѓународната заедница да обезбедат заштита за Палестинците и одговорност за, како што наведе, сторителите на воени злосторства.
Хамас во понеделникот соопшти дека Ал-Хаја е избран за нов лидер на организацијата, наследувајќи го Јахја Синвар, кој беше убиен во октомври 2024 година во судир со израелските сили во јужниот дел на Појасот Газа. Последните години Ал-Хаја живее во Катар и беше главен преговарач на Хамас во индиректните разговори со Израел за прекин на огнот.
