Синдикатот на културата повторно излезе на протест, овојпат пред Македонската опера и балет, каде културните работници испратија пораки за, како што велат, потценетиот труд и лошиот однос кон вработените во културата. Причината е тенденцијата да се укине Колективниот договор за култура, кој стана точка за судир меѓу државата и вработените во екторот.
Додека пред објектот пристигнуваа гости кои чекаа да влезат на настанот, спроти нив стоеја уметници и културни работници со транспаренти во рацете, а меѓу двете страни беше распоредена полиција која го обезбедуваше протестот.
На транспарентите беа испишани пораки:
„Секоја улога носи години труд на грб“,
„Уметниците треба да живеат од својата работа“,
„Почитта кон трудот на уметникот се покажува со дела“,
„Трудот во културата не е трошок“,
„Аплаузот не плаќа сметки и уметникот е работник“,
„Ова што ќе го гледате и слушате вечерва е труд, не е привилегија“,
„За вашето уживање во гледалиштето стојат работнички права зад завесата“.
Дел од пораките беа директно насочени и кон министерот за култура и туризам, Зоран Љутков.
„Љутков, твоите колеги ќе помнат дека ја уби културата“, пишуваше на еден од транспарентите, на кој имаше и илустрација од „мртов“ колективен договор.
