Лондон ги предупредува граѓаните: Подгответе залихи за прекин на струја, поплави и други кризи

Британскиот министер за одбрана Вес Стритинг ги повика граѓаните во своите домови да имаат основни залихи, како готовина, флаширана вода и конзервирана храна, во случај на војна, природни катастрофи или други сериозни кризи.

Стритинг предупреди дека Велика Британија се соочува со зголемен ризик од шумски пожари, поплави, сајбернапади и други закани. Според него, потребен е пристап што ќе го вклучи целото општество за да се зголеми отпорноста на земјата.

— реклама —

Во разговор за британскиот весник „Сан“, тој порача дека граѓаните треба да бидат внимателни, но да не бидат вознемирени, нагласувајќи дека подготовката не бара големи жртви, туку основни мерки на претпазливост.

— реклама —

Како пример ја посочи можноста граѓаните привремено да останат без пристап до електронското банкарство или без електрична енергија.

„Тоа значи да имате нешто готовина дома, залиха флаширана вода и конзервирана храна до која можете да пристапите ако снема струја и не можете да готвите на шпорет или во микробранова печка“, рече Стритинг.

— реклама —

Тој посочи дека Велика Британија се соочува со ризици од непријателски држави и терористички групи, но и со сè поекстремни временски појави, меѓу кои поплави и шумски пожари.

— реклама —

Стритинг ги повика граѓаните да размислат како би реагирале во случај на природна непогода, терористички напад или, во крајни околности, војна.

Британската влада веќе објави и список со основни средства што се препорачуваат за секое домаќинство во случај на криза. Меѓу нив се комплет за прва помош, батерии, фенерче и радио-приемник.