Мајка и дете нападнати од бездомни кучиња кај Цементарница, бараат реакција од институциите

Мајка и нејзиното седумгодишно дете за малку избегнале сериозни повреди откако три бездомни кучиња ги нападнале во близина на Цементарница во скопската општина Кисела Вода.

— реклама —

Според сведоштвото што жената го споделила на социјалните мрежи, нападот се случил на тротоарот покрај булеварот „Борис Трајковски“, во близина на бензинската станица „Лукоил“. За да се спасат од кучињата, таа и детето биле принудени да истрчаат на коловозот по кој се движеле автомобили.

— реклама —

— реклама —

Жената веднаш го пријавила случајот во полиција, од каде што ја упатиле во ЈП „Лајка“, со образложение дека полицијата не е надлежна за бездомните кучиња. Таа посочува дека претпријатието нема доволно капацитети да ги задржи сите улични животни и работи според принципот на заловување, стерилизација и враќање на животните на локацијата.

Мајката бара итна реакција од надлежните институции и одговорност за безбедноста на граѓаните, особено на децата. Таа прашува дали е потребно да се случи трагедија за институциите посериозно да се зафатат со проблемот со бездомните кучиња.