Мајка во САД ги задушила трите деца со ленти за вежбање, поранешниот сопруг ги тужи психијатарот и медицинската сестра кои ја лекувале од постпородилна психоза

Адвокатот на Линдзи Кленси ги отфрли медиумските наводи дека неговата клиентка ќе сведочи во граѓанската постапка што ја покрена нејзиниот поранешен сопруг, Патрик Кленси, против двајца специјалисти за ментално здравје кои ја лекувале пред смртта на нивните три деца во јануари 2023 година.

— реклама —

Линдзи Кленси (36) е обвинета дека на 24 јануари 2023 година во семејниот дом во Даксбери, во американската сојузна држава Масачусетс, со ленти за вежбање ги задушила петгодишната Кора, тригодишниот Досон и осуммесечниот Калан. Таа не негира дека ги усмртила децата, но нејзината одбрана тврди дека во тој период страдала од тешка постпородилна психоза и слушала гласови што ѝ наредувале да ги убие децата, а потоа и себеси.

Нејзиниот поранешен сопруг во тужбата тврди дека психијатар и медицинска сестра ѝ препишале повеќе силни психијатриски лекови, кои дополнително ѝ ја влошиле состојбата. Според тужбата, здравствените работници не го препознале сериозното влошување на нејзиното ментално здравје ниту соодветно го координирале лекувањето и надзорот. Патрик смета дека соодветната терапија можела да ја спречи трагедијата.

— реклама —

Адвокатот на Линдзи, Кевин Редингтон, ги демантираше тврдењата дека таа планира да сведочи. Тој нагласи дека неговата клиентка никогаш не најавила таква намера и дека адвокатите на Патрик не можат да зборуваат во нејзино име.

— реклама —

Од друга страна, адвокатот на Патрик, Хауард Купер, изјави дека верува оти Линдзи ќе сведочи откако ќе се реши прашањето за нејзините права според Петтиот амандман. Тој тврди дека таа им кажала на обвинетите здравствени работници дека има мисли за убиство и дека се плаши оти на нејзините деца може да им се случи нешто страшно. Редингтон ги отфрли овие наводи, тврдејќи дека Линдзи никогаш не му соопштила на ниту еден здравствен работник дека има такви мисли.

Кривичната постапка против Кленси заврши на 4 септември без пресуда, откако поротата и по седум дена расправа не успеа да донесе едногласна одлука. Обвинителството сега разгледува дали ќе побара ново судење.

Клучното рочиште е закажано за 2 ноември, кога Кленси и нејзиниот адвокат ќе побараат отфрлање на обвиненијата, повикувајќи се на начелото дека никому не може да му се суди двапати за исто кривично дело. Доколку судијата го прифати барањето, обвинителството нема да може повторно да ја гони. Во спротивно, можно е да започне ново судење.