Мајката на една од жртвите во Нови Сад: „Сине, победивме. Вучиќ мора да оди во затвор“

Точно две години по уривањето на бетонската натстрешница на железничката станица во Нови Сад, во Србија, семејствата на 16-те загинати сè уште бараат правда и одговорност за трагедијата од 1 ноември 2024 година. Несреќата, која се случи во 11:52 часот, предизвика масовни протести и студентско движење што прерасна во широк граѓански отпор.

Меѓу загинатите беа и две девојчиња, Валентина и Сара Фириќ, нивниот дедо Ѓорѓе Фириќ, како и уште 13 лица. Меѓу жртвите беше и Стефан Хрка, чија мајка Дијана во изминатите две години стана еден од препознатливите гласови на борбата за правда.

Во разговор за српскиот портал „Нова.рс“, таа раскажа дека болката од загубата не се намалува со времето и дека секојдневно се соочува со отсуството на синот.

— реклама —

„Најтешко е кога ќе погледнеш во телефонот, а нема порака, нема повик. Тоа многу боли. Често одам на гробишта, најмалку двапати неделно. Одам, разговарам со Стефан и во тој момент ми станува малку полесно. Велат дека времето лекува сè, но лажат. Времето не лекува ништо“, изјавила Хрка.

Таа се надева дека по политичките промени во Србија ќе следува и судска разрешница за трагедијата. Очекува промени во обвинителството, судството и полицијата, како и конечно утврдување на одговорноста за смртта на 16-те лица.

— реклама —

Хрка потсети и на други неразјаснети случаи во Србија, меѓу кои падот на воениот хеликоптер во 2015 година, во кој загинаа седум лица, како и несреќата на наплатната рампа кај Дољевац. Таа смета дека треба да се истражат сите случаи и да се утврди кој сноси одговорност.

Посебно ја истакна улогата на студентите во протестното движење, оценувајќи дека младите ја презеле борбата за правда и ги поттикнале граѓаните да се кренат.

„Тоа што студентите ја презедоа борбата врз себе треба да нè засрами. Имаа кичма што ние ја немавме. Треба да им благодариме на овие деца додека сме живи. Ја покренаа лавината и нè раздвижија како народ“, порача таа.

— реклама —

Мајката на Стефан побарала одговорност и од највисоките политички функционери, меѓу кои Александар Вучиќ, Милорад Додик и Зорана Михајловиќ, како и од компаниите што учествувале во обновата на железничката станица, изведувачите и подизведувачите. Според неа, сите треба да бидат сослушани и да одговараат пред законот.

Таа потсети и на масовните убиства во основното училиште „Владислав Рибникар“ во Белград и во селата Дубона и Мало Орашје во 2023 година, нагласувајќи дека трагедиите не смеат да се заборават и дека институциите мора да спречат нивно повторување.

„Треба засекогаш да научиме дека корупцијата убива. Никој никогаш не треба да земе ниту динар за да потпише документ или да направи нешто незаконско, па поради тоа други луѓе да загинуваат и некој да страда“, изјавила Хрка.

На крајот од разговорот, таа испратила порака до семејствата на останатите жртви и повторно му се обратила на својот син.

„Сине, победивме. Уште малку и ќе ја оствариме и конечната победа, токму онака како што треба. Сакам да бидеш горд на сите нас“, рекла Дијана Хрка.