„Мајкрософт“ се подготвува да објави нов бран отпуштања, кои ќе опфатат илјадници вработени, како дел од стратегијата за намалување на трошоците и зголемување на инвестициите во вештачката интелигенција, објави Business Insider.
Според извори запознаени со плановите на компанијата, отпуштањата ќе ги погодат одделите за продажба, консултантски услуги и секторот за видеоигри Xbox. Се очекува тие да опфатат помалку од 2,5 проценти од вкупно околу 220.000 вработени во компанијата, а официјалното соопштение се очекува следната недела.
Дел од вработените на кои ќе им бидат укинати работните места ќе добијат можност веднаш да бидат прераспределени на други позиции во рамките на компанијата.
„Мајкрософт“ и во претходните години спроведуваше кратења на работната сила на почетокот на новата фискална година. Лани компанијата отпушти околу 15.000 вработени во два одделни бранови.
Новите мерки доаѓаат во период кога компанијата интензивно инвестира во развојот на вештачката интелигенција и се обидува да ги намали трошоците во услови на зголемен притисок од инвеститорите и промените на технолошкиот пазар.
