Макарска воведе строга забрана: Од 21 до 6 часот нема алкохол во продавниците

Макарска стана првиот град во Хрватска што воведе забрана за продажба на алкохол во продавниците во текот на ноќта, со цел да се намалат бучавата, нарушувањето на јавниот ред и прекумерното консумирање алкохол на јавни места.

Според новите правила, од 21 часот навечер до 6 часот наутро, во продавниците, киосците, продавниците за сувенири, пекарниците и слаткарниците нема да биде дозволена продажба на алкохолни пијалаци. Мерката не се однесува на угостителските објекти, каде што алкохолот ќе продолжи да се служи вообичаено.

— реклама —

Градоначалникот на Макарска, Зоран Пауновиќ, вели дека целта е да се спречат сценарија какви што, според него, се случуваат во други туристички градови, каде што посетителите, по излегување од ноќните клубови, купуваат дополнителен алкохол и предизвикуваат неред на улиците.

— реклама —

„Не сакаме да ни се случи сценариото од Сплит, каде што туристите и младите, по напуштањето на клубовите, купуваат уште алкохол и создаваат дополнителен хаос“, изјави Пауновиќ.

Мерката ќе важи во текот на целата година, а не само за време на туристичката сезона.

— реклама —

Одлуката предизвика поделени реакции. Дел од трговците сметаат дека забраната ќе влијае врз нивната заработка и ќе ги одврати туристите, додека дел од жителите ја поддржуваат, оценувајќи дека ќе придонесе за помирни улици и помалку инциденти во текот на ноќта.

— реклама —

И туристите имаат различни ставови. Некои сметаат дека ваквата мерка е неопходна за подобар јавен ред, додека други оценуваат дека непотребно ги ограничува посетителите.

Спроведувањето на забраната ќе го контролира Државниот инспекторат, кој ќе проверува дали трговците ја почитуваат новата регулатива. Градските власти очекуваат поголеми проблеми да имаат помалите продажни објекти, додека поголемите трговски синџири веќе имаат искуство со слични правила во други европски земји.