Македонија и уште пет земји од Западен Балкан се приближуваат до укинување на роамингот со ЕУ

Граѓаните на Македонија и на уште пет земји од Западен Балкан би можеле во иднина да ги користат мобилните услуги во Европската Унија без дополнителни трошоци за роаминг. Европската комисија ги започна преговорите за вклучување на регионот во европската шема „Роаминг како дома“.

— реклама —

Иницијативата ги опфаќа Македонија, Албанија, Босна и Херцеговина, Косово, Црна Гора и Србија, а ја најави претседателката на Европската комисија, Урсула фон дер Лајен, за време на посетата на регионот во октомври.

— реклама —

Со приклучувањето кон системот, граѓаните ќе можат да остваруваат телефонски разговори, да испраќаат СМС-пораки и да користат мобилен интернет во земјите членки на ЕУ според условите на своите домашни претплатнички пакети. Истите правила ќе важат и за граѓаните на ЕУ кои патуваат во земјите од Западен Балкан.

За вклучување во шемата, потребно е секоја земја да склучи посебен договор со ЕУ и целосно да го усогласи националното законодавство со европските правила за роаминг. По исполнувањето на овие услови, Европската комисија ќе побара од Советот на ЕУ да го одобри нивното приклучување кон заедничкиот систем.

— реклама —

Советот на ЕУ уште во јуни 2026 година даде согласност за почеток на преговорите, потсетува „Н1“.

— реклама —

Засега не е утврден рок за завршување на преговорите, ниту датум од кој би почнало да важи укинувањето на дополнителните трошоци. Се очекува идните договори да бидат поврзани со постојните договори за стабилизација и асоцијација меѓу ЕУ и земјите од регионот.