СДСМ преку соопштение обвини дека Македонија останува надвор од клучните европски инфраструктурни проекти, оценувајќи дека актуелната влада ја води државата кон изолација наместо кон интеграција.
„Од Софија до Атина за шест часа ќе сообраќа брз воз низ Европа, а Скопје го нема на картата. Ваква е изолацијата што ја води Мицкоски и неговата банда“, соопштија од опозициската партија.
Според СДСМ, и покрај најавите за нови инвестиции во железничката инфраструктура, Македонија останува исклучена од европските транспортни планови, додека проектите што се реализираат, како што тврдат, не се во интерес на државата.
„Целиот проект што моментално се реализира е во интерес на Вучиќ и на Кинезите. Само тие имаат корист од овие планови“, наведуваат од партијата.
Во соопштението се посочува и на изјавите на вицепремиерот Иван Стоилковиќ, за кои СДСМ оценува дека потврдуваат ориентација кон кинеските интереси.
„Стоилковиќ, првиот соработник на Мицкоски и втор човек во Владата, отворено најавува блиски односи со Комунистичката партија на Кина и нивните инвестиции. Јасно е за кого работи“, велат од СДСМ.
Опозициската партија прави паралела и со случувањата во Унгарија, наведувајќи дека новата унгарска влада веќе формирала тело кое ќе го истражува работењето на Виктор Орбан, вклучително и трошењето средства за железнички проекти.
„Мицкоски и неговата банда не градат за Македонија. Тие градат за своите пријатели и за странски интереси. Затоа Македонија останува надвор од картата на Европа“, наведуваат од СДСМ.
Од партијата порачаа дека на државата ѝ се потребни реформи и забрзување на европската интеграција, наместо, како што велат, „изолација и лажни инвестиции“.
„Доста е со изолација и лажни инвестиции. Реформи сега. Европа сега“, порачуваат од СДСМ.
