„Македонија ја тресе епидемија на западнонилска треска - а во Скопје ќе прскаат против комарци дури утре“, вели СДСМ

СДСМ преку соопштение обвинува дека институциите доцнат со мерките за спречување на ширењето на западнонилската треска, посочувајќи дека во Скопје прскањето против комарци започнува дури утре, иако веќе е прогласена епидемија.

— реклама —

Од опозициската партија велат дека во изминатите недели граѓаните се соочуваат со повеќе проблеми поврзани со јавното здравје, а институциите, според нив, реагираат дури откако состојбата ќе се влоши.

СДСМ го поврзува актуелниот проблем со западнонилската треска и со кризата со водата во Гостивар, тврдејќи дека и во двата случаи реакцијата на надлежните била задоцнета.

— реклама —

Според партијата, во Скопје веќе има повеќе заразени лица, дел од нив се хоспитализирани, а има и смртни случаи. Оттаму прашуваат зошто мерките за намалување на бројот на комарци не биле спроведени порано.

— реклама —

„Пет недели проблеми со водата. Две недели епидемија на западнонилска треска. А прскањето против комарци во Скопје почнува дури утре“, наведуваат од СДСМ.

Од партијата критикуваат и поради, како што велат, недостигот од јасни информации и одговори од надлежните институции. Според нив, јавноста не добива доволно објаснувања за состојбата, мерките и одговорноста за досегашните пропусти.

— реклама —

СДСМ бара навремена реакција од институциите и поголема транспарентност во справувањето со епидемијата, оценувајќи дека здравствените ризици не смеат да се решаваат само со политички препукувања и медиумски настапи.