Апелациониот суд Скопје донесе правосилна пресуда со која делумно ја уважи жалбата на Зијадин Села и ја зголеми отштетата што Република Македонија треба да му ја исплати како нематеријална штета по нападот во Собранието на 27 април 2017 година.
Со пресудата, државата е задолжена да му исплати вкупно 7.800.000 денари поради повреда на личните права на телесното и душевното здравје на Села, дознава „Скопје1“. Од споредбата на двете пресуди, се гледа дека образложнието на Апелациониот суд е речиси идентично како на Граѓанскиот суд, само е досуден повисок надомест по жалбата на Села.
„При тоа, првостепениот суд не ја оценил доволно сериозноста на повреденото добро и не ја земал предвид целта за која служи надоместот, ниту ги опфатил сите релевантни околности и параметри кои влијаат врз определувањето на справедливата висина на надоместот. Поради тоа, досудените износи како во првостепената пресуда не ги исполнуваат стремежите на надоместокот, не овозможуваат реално обештетување и не ја отсликуваат сериозноста на повредите со кои се здобил тужителот како последица на критичниот настан. Со овие корегирани и зголемени износи, вкупниот надомест на нематеријална штета изнесува 7.800.000,00 денари, што, согласно член 189 од ЗОО, ја отсликува сериозноста на повредите, долготрајноста на страдањето, влијанието врз психолошката рамнотежа и социјалното функционирање на тужителот, како и јавниот карактер на настанот, обезбедувајќи реална психолошка сатисфакција и правично обештетување без да се достигне прекумерно компензирање на штетата, од причина што критериумите за определување на правичен надомест на нематеријална штета треба да се ценат, не генерализирано, воопштено преку нивната појавна форма, туку пооделно, вклучително и од аспект на личната перцепција и начинот на кој индивидуата го доживува штетниот настан што од своја страна директно влијае на детерминирачките критериуми во поглед на нивниот интензитет и времетраење.“, стои во образложението на Апелација.
Од вкупниот износ, судот досудил:
1.500.000 денари за претрпени физички болки,
900.000 денари за претрпен страв,
3.000.000 денари за претрпени душевни болки поради намалена општа животна активност,
600.000 денари за душевни болки поради нагрденост,
600.000 денари за повреда на личното достоинство,
600.000 денари за повреда на честа и
600.000 денари за повреда на угледот. На износите следува и законска казнена камата од 1 јуни 2023 година до исплатата.
Апелациониот суд ја одбил жалбата на Државното правобранителство како неоснована, а тие барале пресудата да биде укината и предметот одново да се суди. Жалбата на Села второстепените судии ја уважиле делумно, преиначувајќи ја пресудата на Основниот граѓански суд Скопје, кој претходно му беше досудил 5,5 милиони денари.
Села во тужбата барал вкупно 61 милион денари надомест на штета, но судот го одбил барањето во делот над досудените 7,8 милиони денари како неосновано.
Во образложението на пресудата се наведува дека на 27 април 2017 година Села бил нападнат во Собранието од поголем број лица, при што се здобил со тешки телесни повреди опасни по живот. Според судот, тој бил удиран со тупаници, клоци и тврди предмети, по што во бесвесна состојба бил пренесен на лекување.
Судот се повикува и на претходните правосилни кривични пресуди со кои повеќе лица беа осудени за нападот врз тогашниот пратеник Зијадин Села, како и на медицинските вештачења според кои кај него останале сериозни физички и психички последици, вклучително и посттрауматски симптоми, намалена животна активност и долготрајни душевни болки, што претходно биле ценети и од Граѓанскиот суд.
Со истата одлука, Република Македонија е задолжена да му ги надомести и трошоците на постапката во износ од 210.715 денари.
