Премиерот Христијан Мицкоски од Њујорк порача дека Македонија останува посветена на европскиот пат, но истовремено ќе продолжи да ги штити своите национални и државни интереси. На самитот „Конкордија“, кој се одржува паралелно со Генералното собрание на Обединетите нации, Мицкоски говореше за евроинтеграциите, односите со САД, стратешките инфраструктурни проекти и економските резултати.
На панелот со грузиската заменик-премиерка Мака Ботчоришвили, Мицкоски се осврна на долгогодишниот процес на пристапување на Македонија кон Европската Унија. Тој оцени дека земјата во изминатиот период направила голем број отстапки, но дека и покрај тоа останува определена да продолжи кон членство во ЕУ.
„Ние го започнавме нашето патување пред речиси две и пол децении. И, за жал, поради некои вештачки причини, не успеавме да станеме дел од ЕУ. Веројатно еден ден ќе го постигнеме овој камен-темелник. Во меѓувреме, фрустрацијата кај македонските граѓани е огромна, бидејќи во минатото направивме премногу отстапки“, рече Мицкоски.
Тој посочи дека за неговата генерација европските интеграции требало да значат подобрување и промена на институциите, а не промена на идентитетот. Според него, постојат земји членки кои билатерални прашања ги поврзуваат со европскиот процес.
Мицкоски нагласи дека Македонија продолжува да работи на усогласување со европските стандарди и дека земјата ја усогласила својата заедничка надворешна и безбедносна политика со ЕУ.
„Ние не само што чекаме, ние работиме на нашиот развој, ја завршуваме нашата домашна задача, не го губиме времето, туку напротив — ова е нашиот стратешки камен-темелник и ќе останеме на тој пат напред“, изјави премиерот.
Во однос на односите со Соединетите Американски Држави, Мицкоски рече дека стратешкото партнерство меѓу двете земји станува сè подлабоко. Тој се осврна на соработката во воената индустрија, енергетиката и ископувањето на критичниот минерал антимон, со поддршка од американската ДФЦ.
Премиерот посочи и дека Македонија сака да биде пример за американското присуство во регионот и Европа, нагласувајќи ја важноста на сојузништвото во рамките на НАТО.
Мицкоски говореше и за инфраструктурните и енергетските проекти на земјата. Тој го посочи обновениот нафтовод што го поврзува солунското пристаниште со македонската рафинерија, како и изградбата на гасоводните интерконектори со Грција и Србија.
Според неговите најави, јужниот гасен интерконектор би требало да започне со работа најдоцна до крајот на четвртиот квартал од 2027 година, додека северниот интерконектор се очекува да биде во функција на крајот на 2028 година.
Во тој контекст, Мицкоски ја истакна и стратешката важност на Коридорите 8 и 10, кои, како што рече, се вкрстуваат во близина на Скопје и имаат значење за поврзувањето на регионот, но и за источното крило на НАТО.
На самитот тој се осврна и на економските показатели. Мицкоски изјави дека според последните податоци за вториот квартал од 2026 година, реалниот економски раст изнесувал 4,3 проценти, додека номиналниот бил над 8 проценти.
Тој посочи дека приоритет на Владата по изборите во 2024 година биле стабилизацијата на институциите, макроекономската и фискалната стабилност. Според него, годишната инфлација во август била под европскиот просек и се одржувала меѓу 2 и 2,5 проценти.
Мицкоски оцени дека и покрај предизвиците со снабдувањето со нафтени деривати, економијата е во добра состојба и изрази уверување дека животниот стандард ќе продолжи да се подобрува.
