Македонската економија седум квартали по ред бележи раст повисок од три проценти и тоа претставува доказ дека економските политики на Владата даваат резултати, стои во соопштението на ВМРО-ДПМНЕ.
Од партијата оценуваат дека позитивните економски показатели се резултат на мерките насочени кон финансиска стабилност, капитални инвестиции, привлекување странски директни инвестиции и поддршка на домашната економија.
„Македонија седум квартали по ред бележи економски раст над 3 проценти, што претставува јасна потврда дека државата се движи во правилна насока“, наведуваат од ВМРО-ДПМНЕ.
Според партијата, ваквите политики создаваат услови за отворање нови работни места, економски развој и подобрување на животниот стандард на граѓаните.
Во соопштението се посочува дека земјава според стапката на економски раст се наоѓа меѓу водечките економии во Европа, додека просечната нето-плата е повисока за 8,2 проценти во споредба со истиот период минатата година.
Од ВМРО-ДПМНЕ во соопштението наведуваат и дека во изминатиот период биле отворени 17.000 нови работни места, што, според нив, е показател за позитивните движења на пазарот на трудот и за создавање нови можности за вработување.
Партијата во соопштението истакнува дека позитивни резултати се забележуваат и кај јавните финансии, при што посочува дека јавниот долг се намалува, буџетските приходи растат, а средствата се насочуваат кон реализација на капитални проекти.
Од ВМРО-ДПМНЕ порачуваат дека Владата ќе продолжи со политики насочени кон привлекување инвестиции, одржување на финансиската стабилност и обезбедување услови за повисоки плати, пензии и подобар животен стандард за граѓаните.
„Резултатите се видливи, економијата расте, инвестициите се зголемуваат, се отвораат нови работни места и се создаваат услови за посигурна иднина“, наведуваат од партијата.
