„Македонија шеста најсиромашна земја во Европа – Мицкоски раскажува бајки“, велат од СДСМ

Социјалдемократски сојуз на Македонија преку соопштение обвини дека Македонија е шеста најсиромашна земја во Европа, повикувајќи се на податоци објавени од „WorldAtlas“, додека премиерот Христијан Мицкоски, според партијата, „секојдневно раскажува бајки за трета економија во Европа“.

— реклама —

Од СДСМ велат дека граѓаните секојдневно се соочуваат со високите цени, намалената куповна моќ и влошениот животен стандард.

— реклама —

Партијата во соопштението оцени дека состојбата со Буџетот е „алармантно лоша“ и дека недостигаат средства за повисоки плати, за минимална плата од 600 евра и за мерки за заштита на животниот стандард.

Во соопштението се наведува дека има доцнења и во исплатата на плати, посочувајќи го случајот со вработените во Пошта на Северна Македонија.

— реклама —

Според СДСМ, Владата се обидува да го покрие недостатокот на средства преку нови задолжувања, при што последното задолжување изнесува 260 милиони евра. Од партијата тврдат дека Владата побарала 300 милиони евра, но банките понудиле помал износ.

— реклама —

„Од доаѓањето на власт до денес, Мицкоски го зголеми јавниот долг за 2,5 милијарди евра“, наведуваат од СДСМ, обвинувајќи ја Владата за, како што велат, ризични и неодржливи економски политики.