Македонска државјанка обвинета во САД дека незаконски гласала на изборите во 2024 година

Македонската државјанка Сара Љума е обвинета во Соединетите Американски Држави дека незаконски гласала на федералните избори одржани во ноември 2024 година во сојузната држава Висконсин.

Обвинението било поднесено на 30 септември, а случајот вчера го објави Канцеларијата на американскиот обвинител за Источниот округ на Висконсин.

— реклама —

Според кривичната пријава, Љума е родена во Македонија, има македонско државјанство и нема државјанство на САД. Федералните обвинители тврдат дека на 5 ноември 2024 година гласала на федералните избори во градот Шебојган, иако како лице без американско државјанство немала право да гласа на федерални избори.

Во пријавата се наведува дека таа се регистрирала како гласач истиот ден кога се одржувале изборите. При регистрацијата потпишала формулар во кој навела дека е државјанка на САД.

— реклама —

Министерството за правда на САД соопшти дека Љума подоцна била интервјуирана од федерален службеник за спроведување на законот и дека во разговорот признала оти на 5 ноември 2024 година се регистрирала и гласала во Шебојган.

— реклама —

Според податоците од имиграцискиот суд на кои се повикува Министерството за правда, Љума била приведена на 13 август годинава при обид повторно да влезе во САД. Во септември, во рамките на постапката за нејзино отстранување од земјата, ѝ било дозволено доброволно да се врати во Македонија.

Американските власти наведуваат дека доколку повторно се обиде да влезе во САД, ќе биде уапсена.

Во соопштението е цитиран првиот помошник американски обвинител за Источниот округ на Висконсин, Бред Шимел, кој истакнал дека зачувувањето на изборниот интегритет е од исклучително значење за американските власти и дека гласањето на лица кои не се американски државјани е незаконско.

Од Министерството за правда, сепак, нагласуваат дека кривичната пријава претставува само обвинение и не е доказ дека Љума го сторила делото за кое се товари. Таа се смета за невина сè додека евентуалната вина не биде докажана пред суд.