ВМРО-ДПМНЕ преку соопштение обвини дека блокадите што, според партијата, ги спроведуваат СДС, Левица и ДУИ во Собранието се на директна штета на македонската дијаспора и на граѓаните.
Од партијата велат дека со опструкциите на законските решенија, кои треба да ги олеснат административните процедури и да ги подобрат услугите за иселениците, опозициските партии ги ставаат партиските интереси пред потребите на македонските граѓани што живеат и работат во странство.
Според ВМРО-ДПМНЕ, македонската дијаспора со години дава значителен придонес за развојот на државата преку инвестиции, поддршка на своите семејства, создавање економски врски и промоција на Македонија во светот.
Партијата тврди дека наместо да се овозможат побрзи и поефикасни услуги, како и олеснување на гласањето преку новиот Изборен законик, СДС, Левица и ДУИ ги блокираат овие процеси.
Од ВМРО-ДПМНЕ порачуваат дека Владата останува посветена на унапредување на услугите за дијаспората и повикуваат, како што наведуваат, да престанат политичките блокади и да се овозможи носење на законските решенија во интерес на сите македонски граѓани, без разлика каде живеат.
