Македонија за првпат доби официјално заштитен национален минерален симбол, откако македонскиот рубин беше прогласен за заштитено национално минерално наследство.
Министерката за енергетика, рударство и минерални суровини Сања Божиновска соопшти дека успешно е завршен процесот на институционална заштита на македонскиот рубин – минерал кој претставува значаен дел од природното, геолошкото и културното наследство на земјата.
„Го заштитивме македонскиот рубин. Денес државата добива нешто автентично македонско, официјално признаено и заштитено. Ова е само почеток и ќе продолжиме со заштита и на други уникатни минерални богатства“, изјави Божиновска.
Со донесената одлука, македонскиот рубин добива статус на заштитено национално минерално наследство и станува првиот официјално заштитен минерален симбол на државата.
Од Министерството посочуваат дека процесот на заштита бил комплексен и вклучувал соработка меѓу повеќе институции, експерти и стручни служби. Значаен придонес во постапката дале Геолошкиот завод, Државниот завод за индустриска сопственост, како и повеќе експерти кои работеле на подготовката на потребната документација.
Македонскиот рубин е познат по својата карактеристична малиново-розева боја, која се должи на присуството на хром во неговата структура. Неговата уникатност е во тоа што се среќава исклучиво во околината на Прилеп и планинските предели на Мариово, што го прави единствен природен рубин во копнена Европа кој се обработува локално.
Покрај минералошката и естетската вредност, рубинот се смета и за дел од културното и историското наследство на Македонија, симболизирајќи ја природната убавина и автентичноста на земјата.
Постапката за негова заштита започна во септември 2025 година, а со донесеното решение официјално е заокружен процесот на негово признавање и институционална заштита.
Од Министерството нагласуваат дека ќе продолжат со активности за заштита, промоција и одржливо управување со минералните ресурси, со цел зачувување и афирмација на природното богатство на Македонија.
Со оваа одлука, македонскиот рубин отсега и официјално станува национален симбол и дел од заштитеното природно наследство на државата.
